ایچ ای سی کی نئی پالیسی کے خلاف طلباٗ کا احتجاج

بذریعہ ٹیم سی جی
|
دسمبر 29, 2020
|

ذرائع نے بتایا ہے کہ اسلامی جمعیت طلبہ نے منگل کے روز ہائر ایجوکیشن کمیشن پاکستان (ایچ ای سی) کے اعلان کردہ ایسوسی ایٹ ڈگری پروگرام کے خلاف احتجاج کیا۔

مظاہرے میں گفتگو کرتے ہوئے آئی جے ٹی کراچی کے ناظم حافظ عمر احمد خان نے کہا کہ پاکستان میڈیکل کمیشن کی ازسر نو تشکیل کی جائے اور دوبارہ داخلے کے لیے ٹیسٹ کا انعقاد جلد کرایا جائے۔

انہوں نے مزید کہا کہ ایچ ای سی کے دو سالہ ڈگری پروگرام کو ختم نہیں کیا جانا چاہیے کیونکہ اس سے ہزاروں طلبا متاثر ہوئے ہیں جو ایچ ای سی کی چار سالہ بیچلرز پروگرام پالیسی کی وجہ سے اپنی ڈگری مکمل نہیں کرسکے۔

رواں سال نومبر میں، ایچ ای سی نے تمام تعلیمی اداروں سے دو سالہ بیچلرز ڈگری پروگرام کو ختم کرنے کا اعلان کیا تھا اور کہا تھا کہ ایچ ای سی 2018 کے بعد کی جانے والی کسی بھی دو سالہ بیچلرز ڈگری کی تصدیق نہیں کرے گا۔ اس کے علاوہ ایچ ای سی نے 2019 میں یہ بھی اعلان کیا کہ وہ دو سالہ بی اے، بی ایس سی پروگرامز کو ختم کردے گا اور اس کے بجائے طلباء کو ایسوسی ایٹ ڈگری (اے ڈی) دی جائے گی۔

کمیشن نے بی اے اور بی ایس سی کی ڈگری کو اے ڈی کرنے کے لیے اصطلاحات بھی تبدیل کردی ہیں۔ دوسری جانب مظاہرین نے پاکستان میڈیکل کمیشن (پی ایم سی) کے زیر اہتمام میڈیکل اینڈ ڈینٹل کالجز کے داخلہ ٹیسٹ (ایم ڈی کیٹ) میں تضادات کا جواب دینے کا بھی مطالبہ کیا۔