پنجاب میں چھٹی اور اس سےاوپر کی کلاسز کےلیےاسکول دوبارہ کھولنے کااعلان

پنجاب کے وزیر تعلیم مراد راس نے نجی اسکولوں کے مالکان کے ساتھ ایک اہم ملاقات کی۔ یہ ملاقات اسکولوں کو دوبارہ کھولنے کے حوالے سے ایس او پیز کی درخواست کا جائزہ لینے کے لیے طلب کیا گیا تھا۔

میڈیا رپورٹس کے مطابق صوبائی وزیرتعلیم نے پہلے مرحلے میں 15 ستمبر کو چھٹی جماعت اور اس سے اوپر کی کلاسز کے بچوں کے لیے اسکول کھولنے کا اعلان کیاہے۔ تاہم ساتھ ہی یہ بھی کہا ہے کہ نرسری سے لے کر کلاس 5 تک کے طلباء کی کلاسز دوبارہ شروع کرنے کا اقدام ملک میں کورونا وائرس کی صورتحال سے مشروط ہوگا۔

اجلاس میں فیصلہ کیا گیا کہ طلباء کو بیچز کی شکل میں اسکول بلایا جائے گا اور تمام طلبا کو ایک ہی وقت میں اسکول آنے کی اجازت نہیں دی جائے گی۔ انہوں نے مزید بتایا کہ ہر جماعت کے طلباء کو دو گروپوں میں اسکول بلایا جائے گا اور ہر گروپ متبادل دنوں میں اسکول آئے گا۔

صوبائی وزیر تعلیم نے اسکول مالکان کو 25 اگست تک جواب دینے کا مشورہ دیا ہے۔

اس سے قبل رواں ماہ کے اوائل میں حکومت پنجاب نے اسکول کھولنے کے لیے تفصیلی ایس او پیز جاری کئے تھے جن میں کورونا وائرس سے بچائو کے بنیادی اصول، صحت سے متعلق آگاہی اور حفظان صحت سے متعلق اقدامات شامل ہیں۔