سندھ اور وفاق شعبہ تعلیم کی بہتری کے لیے ٹھوس اقدامات پر متفق

وفاقی وزیر تعلیم شفقت محمود نے سندھ کے وزیر تعلیم سعید غنی سے ان کے دفتر میں ملاقات کی، اس موقع پر شعبہ تعلیم کی بہتری اور باہمی دلچسپی کے دیگر امور پر بات چیت کی گئی۔

ملک بھر کے تعلیمی اداروں کو پندرہ سے تیس ستمبر کے درمیان مختلف مراحل میں کھولنے کے مشترکہ فیصلے کے بعد وفاقی وزیر تعلیم شفقت محمود نے اس امید کا اظہار کیا کہ مستقبل میں تعلیم سے متعلق تمام فیصلے مشترکہ طور پر کیے جائیں گے۔

ان کا کہنا تھا کہ سندھ اور وفاق شعبہ تعلیم کی بہتری کے لیے ٹھوس اقدامات پر متفق ہیں۔ صوبائی وزیر تعلیم کا کہنا تھا کہ تعلیم کی بہتری کے لیے ٹھوس اقدامات عمل درآمد اور باضابطہ اعلان ابھی صرف صوبوں تک محدود ہے۔

ان کا کہنا تھا کہ کورونا وائرس کا وبائی مرض پھیلنے کے بعد سے تعلیمی اداروں کے حوالے سے ٹھوس پالیسی سازی کی وجہ سے بہت سارے مسائل حل ہوگئے ہیں۔

انہوں نے اعتراف کیا کہ یقینا مسائل پیدا ہوئے ہیں لیکن ان کا یہ بھی کہنا تھا کہ ان مسائل کو حل کرنے کی کوشش کی جارہی ہے۔

دونوں وزرا کا کہنا تھا کہ وہ ملک میں تعلیم کے معیار کو بہتر بنانے کی پوری کوشش کر رہے ہیں۔

اس موقع پر سعید غنی نے کہا کہ نصاب اور تعلیمی سال سے متعلق امور پر تمام صوبوں کی مشاورت سے ملک بھر میں تعلیم کے معیار کو بہتر بنانا ممکن ہوگا۔

تاہم انہوں نے مزید کہا کہ اٹھارہویں ترمیم کی روشنی میں کسی بھی طرح کے اقدامات کا باضابطہ اعلان اور مشترکہ فیصلوں پر عمل درآمد صوبوں پر منحصر ہوگا۔

ملاقات میں وفاقی وزیرتعلیم شفقت محمود نے انگریزی زبان کو نصاب سے خارج کرنے کے بارے میں افواہوں کی تردید کی جبکہ تعلیم کے شعبے میں اصلاحات کے لیے صوبوں کے درمیان مواصلات کی کمی کو دور کرنے کی ضرورت پر زور دیا جبکہ سعید غنی نے اپنی طرف سے وفاقی وزیر کو صوبے میں شعبہ تعلیم کی بہتری کے لیے ٹیکنالوجی کی شمولیت کی کوششوں سے آگاہ کیا تاکہ صوبے کے نظام تعلیم کو جدید خطوط پر استوار کیا جاسکے۔