کورونا کی دوسری لہر، اسکولز 10 جنوری تک بند رہیں گے

پیر کے روز حکومت نے 26 نومبر سے اگلے سال 10 جنوری تک ملک بھر کے تمام تعلیمی اداروں کو بند رکھنے کا حکم دیا اور کورونا وائرس کی دوسری لہر کے دوران طلبا کے انفیکشن سے متاثر ہونے کے امکانات کو کم کرنے کے لیے 24 دسمبر تک آن لائن کلاسز رکھنے کی ہدایت کی۔ جیسا کہ عالمی سطح پر بھی کیا جا رہا ہے، مقامی ماہرین کو بھی کورونا وائرس کے پھیلائو کا خوف ہے کیونکہ سردیوں کے موسم میں کورونا کے کیسز میں اضافہ ہوتا ہے۔

یہ فیصلہ وفاقی وزیر تعلیم شفقت محمود کی زیرصدارت بین الصوبائی وزرائے تعلیم کانفرنس کے اجلاس میں کیا گیا۔

اجلاس میں فیصلہ کیا گیا کہ اسکول جمعرات سے 24 دسمبر تک بند رہیں گے لیکن کلاسز آن لائن جاری رہیں گی۔ تاہم ، فورم نے اسکولوں کو ہفتے کے دوران ایک یا دو دن طلباء کو کال کرنے کی اجازت دی ہے لیکن کہا ہے کہ اس سلسلے میں حتمی پالیسی صوبائی محکمہ تعلیم کے اختیار میں ہوگی۔ اجلاس میں یہ بھی اعلان کیا گیا کہ موسم سرما کی تعطیلات 25 دسمبر سے 10 جنوری تک ہوں گی۔ فیصلے کے مطابق تدریسی ادارے 26 نومبر سے 24 دسمبر تک بند رہیں گے جبکہ 25 دسمبر سے 10 جنوری تک موسم سرما کی تعطیلات ہوں گی۔

شفقت محمود نے اجلاس کے بعد ایک نیوز کانفرنس میں بتایا کہ کسی بھی کلاس میں طلبا کی جسمانی حاضری نہیں ہوگی۔ اسکولوں ، کالجوں ، یونیورسٹیوں اور ٹیوشن سینٹرز کے طلباء حاضری سے مستثنیٰ ہوں گے کیونکہ وہ گھر سے ہی تعلیم کا سلسلہ جاری رکھیں گے، انہوں نے مزید کہا کہ پیشہ ورانہ تعلیمی اداروں کے طلباء ووکیشنل انسٹیٹیوٹس میں ملازمت کے دوران تربیت جاری رکھیں گے۔

پریس کانفرنس میں وزیر اعظم کے معاون خصوصی ڈاکٹر فیصل سلطان نے صحافیوں کو بتایا کہ 11 جنوری کو تعلیمی اداروں کو دوبارہ کھولنے سے قبل وبائی مرض کی تازہ ترین صورتحال کا جائزہ لینے کے لیے ایک خصوصی اجلاس طلب کیا جائے گا۔

آئی پی ای ایم سی کے فیصلے کے مطابق آن لائن آپشن والے طلباء اس طرز تعلیم کے ذریعے اپنی تعلیم جاری رکھیں گے جب کہ آن لائن سہولیات نہ رکھنے والوں کو ایک خصوصی پالیسی کے تحت سہولت فراہم کی جائے گی ، جو متعلقہ صوبائی حکومتیں متعارف کروائیں گی۔

انہوں نے دسمبر میں طے شدہ امتحانات کی منسوخی کا بھی اعلان کیا جبکہ تشخیص اور بھرتی کے امتحانات جاری رہیں گے۔ انہوں نے مزید کہا کہ بغیر امتحانات کے طلباء کو اگلی کلاس میں ترقی نہیں دی جائے گی۔

شفقت محمود نے چیئرمین ہائیر ایجوکیشن کمیشن (ایچ ای سی) کو ہدایت کی کہ وہ اعلیٰ تعلیم کے طلبہ کے لیے فوری بنیادوں پر آن لائن کلاسوں کا بندوبست کریں۔

انہوں نے کہا کہ یونیورسٹیوں کو پی ایچ ڈی طلباء اور دور دراز کے علاقوں سے آنے والے افراد کو ہاسٹل میں رہنے کی اجازت دی گئی ہے تاکہ ان کی پڑھائی متاثر نہ ہو۔ تاہم وزیر تعلیم نے زور دے کر کہا کہ یونیورسٹیاں ہاسٹل میں مقیم طلبہ کے لیے سخت ایس او پیز کی تعمیل کو یقینی بنائیں گی۔ انہوں نے مزید کہا کہ اسکولوں میں اساتذہ کی حاضری سے متعلق فیصلہ اسکول انتظامیہ کرے گی۔

اس موقع پر ڈاکٹر فیصل سلطان نے خطاب کرتے ہوئے تعلیمی اداروں کی بندش کو کورونا وائرس کے مزید پھیلائو سے روکنے کے حوالے سے بروقت فیصلہ قرار دیا۔ انہوں نے کہا کہ فیصلہ لیتے ہوئے موجودہ کورونا وائرس کی صورتحال کو مدنظر رکھا گیا ہے۔

ڈاکٹر سلطان نے مزید کہا کہ میڈیکل فیلڈ کے لیے تمام انٹری ٹیسٹ جیسے ایم ڈی کیٹ اور سینئر میڈیکل کیئر ٹریننگ کی مختلف سطحوں کا شیڈول کے مطابق انعقاد کیا جائے گا جبکہ کوویڈ سے متعلق تمام ایس او پیز کو بھی یقینی بنایا جائے گا۔

دوسری جانب سندھ نے اس فیصلے کی مخالفت کی ہے۔

سندھ کے وزیر تعلیم اور وزیر برائے محنت سعید غنی نے تمام تعلیمی اداروں کو بند کرنے کے وفاقی حکومت کے فیصلے کی مخالفت کی۔ این سی او سی کے اجلاس میں ، غنی نے تجویز پیش کی کہ طلباء کو اس سال بغیر امتحانات کے اگلی جماعت میں ترقی نہیں دی جانی چاہیے۔ انہوں نے تجویز پیش کی کہ صرف وہی تعلیمی ادارے بند کیے جائیں جن میں پرائمری سطح پر 73 فیصد اسٹوڈنٹس کا داخلہ ہو ، جبکہ چھٹی اور اس سے اوپر کی جماعتیں معمول کے مطابق اپنی تعلیمی سرگرمیاں جاری رکھیں۔ انہوں نے تجویز پیش کی کہ تعلیمی اداروں میں غیر تدریسی سرگرمیوں کو ایک سال کے لہے مکمل طور پر بند کیا جائے۔

دریں اثنا، خیبر پختونخواہ میں مختلف شعبہ ہائے زندگی سے وابستہ افراد نے تعلیمی اداروں کی بندش کو سراہا اور صوبے میں کووڈ نائنٹین کے کیسز میں حالیہ اضافے کے پیش نظر اسے ایک دانشمندانہ فیصلہ قرار دیا۔

دوسری جانب ، بلوچستان پرائیویٹ اسکولز ایسوسی ایشن کے چیئرمین بہادر خان اور صدر داؤد شاہ کاکڑ نے 26 نومبر سے اسکولوں کو بند کرنے کے حکومتی فیصلے کی مذمت کی ہے۔ دائود خان کاکڑ نے بتایا کہ اس سے قبل انہوں نے صوبائی وزیرتعلیم یارمحمد رند سے بھی ملاقات کی اور انہیں بتایا کہ بچوں کے لیے اسمارٹ کورس مکمل ہوچکا ہے لیکن ابھی ٹیسٹ لینا باقی ہے۔