نجی اسکول زیادہ عرصے کی بندش برداشت نہیں کرسکتے، اے پی پی ایس سی اے

اتوار کے روز آل پاکستان پرائیویٹ اسکولز اینڈ کالجز ایسوسی ایشن (اے پی پی ایس سی اے) کی سپریم کونسل نے موجودہ صورتحال کے تحت تعلیمی اداروں کی بندش پر شدید تحفظات کا اظہار کیا۔

حکومت نے کورونا وائرس سے ہونے والی جان لیوا بیماری کے پھیلاؤ کو روکنے کے لیے تعلیمی اداروں کو باقاعدگی سے بند کرنے کا حکم دیا ہے لیکن نجی شعبے کے اسکول اور کالجز کی انتظامیہ انہیں کھلا رکھنا چاہتی ہے۔

ایسوسی ایشن نے کہا ہے کہ وہ حکومت پر دباؤ ڈالنے کے لیے احتجاج اور سڑکیں بند کرنے سمیت مختلف آپشنز پر غور کر رہی ہے۔ اتوار کے روز ناصر محمود اور ملک اظہر کی صدارت میں آل پاکستان پرائیویٹ اسکولز اینڈ کالجز ایسوسی ایشن ( اے پی پی ایس سی اے) کی سپریم کونسل کا ہنگامی طور پر طلب کردہ اجلاس منعقد ہوا۔

اجلاس کے شرکاء نے حکومت پر دباؤ ڈالنے کے لیے مختلف آپشنز پر زور دیا، انہوں نے کورونا وائرس کی تیسری لہر کے دوران تعلیمی اداروں کی بندش کے حوالے سے خدشات کا اظہار کیا۔

اجلاس کے شرکا نے انتظامیہ، اساتذہ، عملے، والدین اور سول سوسائٹی کے ساتھ بڑے پیمانے پر احتجاج کرنے پر غور کیا۔ مزید برآں مختلف مقامات پر طلباء کے لیے موبائل کلاسز کے انعقاد کے لیے حکمت عملی تشکیل دینے کی غرض سے ایک اجلاس یکم اپریل کو اسلام آباد میں طلب کیا گیا ہے، جس کی زیر صدارت ظفران الٰہی کریں گے۔