ہائیر ایجوکیشن کمیشن کی جانب سے طلبا کے لیے خوش خبری

ایچ ای سی نے 2022 تک دو سالہ ڈگری پروگراموں پر اتفاق کیا ہے۔

تفصیلات کے مطابق ہائیر ایجوکیشن کمیشن (ایچ ای سی) نے 2022 تک دو سالہ بیچلر اور ماسٹر کے پروگراموں کی منظوری پر اتفاق کیا ہے۔ اس نئے فیصلے کے بعد اگلے دو سال کے لیے اب طلبا کو مختلف انڈرگریجویٹ اور گریجویٹ پروگراموں میں داخلہ دیا جائے گا۔

یونیورسٹی آف پشاور کے وائس چانسلر نے اطلاع دی ہے کہ ایچ ای سی نے اگلے دو سال کے لیے دوبارہ دو سالہ ڈگری پروگرام شروع کرنے کا فیصلہ کیا ہے۔ انہوں نے کہا کہ طلبا کو اب 2022 تک ان پروگراموں تک رسائی حاصل کرنے میں کوئی پریشانی نہیں ہوگی۔

پچھلے سال ایچ ای سی نے تمام تعلیمی اداروں کو دو سالہ بیچلرز ڈگری پروگراموں کو ترک کرنے کی ہدایت جاری کی تھی، ایچ ای سی کا کہنا تھا کہ تعلیمی سال 2018 کے بعد ایسے کسی بھی پروگرام کو تسلیم نہیں کیا جائے گا۔

اس سلسلے میں ہائیر ایجوکیشن کمیشن نے ملک کے سرکاری و نجی شعبے کے دونوں ڈگری دینے والے اداروں کو بھی ایک خط لکھا تھا۔ ہائیر ایجوکیشن کمیشن کی جانب سے جاری کردہ نوٹس میں کہا گیا ہے کہ سنجیدہ خدشات کے ساتھ یہ دیکھا گیا ہے کہ یونیورسٹیاں، ڈگری ایوارڈ دینے والے انسٹی ٹیوٹس (ڈی آئی اے) اور ان سے وابستہ کالج اب بھی یہ پروگرام پیش کررہے ہیں۔