سندھ میں فزکس کا امتحانی پیپر آوٹ

سندھ میں فزکس کا امتحانی پیپر لیک

کراچی سمیت سندھ میں میٹرک کے امتحانات کے لیے سیکنڈری اسکول سرٹیفکیٹ سالانہ امتحانات برائے2021 (میٹرک کے امتحانات) کا انعقاد کیا جارہا ہے۔

مقامی نیوز چینل کے مطابق کراچی میں میٹرک کا پہلا پرچہ امتحان شروع ہونے کے چند منٹ بعد ہی آؤٹ ہوگیا، فزکس کا پرچہ ساڑھے 9 بجے شروع ہوا اور 9بجکر 34 منٹ پر فوٹوکاپی کی دکانوں پر دستیاب تھا۔

میٹرک کے سالانہ امتحانات کا کراچی میں آج سے آغاز ہوگیا ہے تاہم پہلے روز ہی بدانتظامی کا واقعہ اس وقت رپورٹ ہوا جب فزکس کا پیپر شروع ہوجانے کے 4 منٹ بعد ہی فوٹو کاپی کی دکانوں پر تو پہنچ گیا مگر الآصف گورنمنٹ اسکول ملیر تک نہ پہنچ سکا۔ جسے انتظامیہ کی نا اہلی قرار دیا جارہا ہے۔

مزید پڑھیئے: میٹرک کے داخلہ کارڈ روکنے والے اسکولوں کے خلاف سخت کارروائی کا اعلان

اطلاعات کے مطابق اسکول میں 10 بجے تک بھی پیپر شروع نہیں ہوسکا تھا جبکہ اسکول انتظامیہ کا اس صورتحال پر کہنا تھا کہ طلبہ کو اضافی وقت دیا جائے گا۔

دوسری جانب امتحان کے آغاز کے 4 منٹ بعد آؤٹ ہونے والا پرچہ سوشل میڈیا پر وائرل ہوگیا، جبکہ کچھ مراکز پر طلباء امتحانی کاپی لیے پیپر شروع ہونے کا انتظار کرتے رہے اور وہاں موجود ان کے والدین بھی پریشان کا شکار ہوئے۔

ایسی ہی صورتحال سے دوچار ایک اسکول کے ٹیچر کا کہنا تھا کہ بچوں کو پیپر کرنے کے لیے 2 گھنٹے کا پورا وقت دیا جائے گا۔

مزید پڑھیئے: پشاور میں مدارس کے 70 فیصد طلباء کی ویکسینیشن کا عمل مکمل

دوسری جانب چیئرمین میٹرک بورڈ کی جانب سے جاری بیان میں کہا گیا تھا کہ میٹرک امتحانات میں ایس او پیز کی خلاف ورزی پر امتحانی مرکز کے سپرنٹنڈنٹ کو معطل کر دیا جائے گا۔

بی ایس ای کے کے چیئرپرسن کی درخواست پر ضلعی انتظامیہ نے قانون نافذ کرنے والے اداروں کو تمام امتحانی مراکز پر دفعہ 144 نافذ کرنے کے لیے خطوط ارسال کیے گئے ہیں، جس کے کسی بھی امتحانی مرکز پر کسی قسم کی تحت بیرونی مداخلت ممنوع ہوگی