کورونا وائرس: این سی او سی کی موسم سرما کی جلد چھٹیوں کی تجویز

نیشنل کمانڈ اینڈ آپریشن سینٹر (این سی او سی) نے تعلیمی اداروں میں کورونا وائرس کے کیسز میں اضافے کے تناظر میں طلباء کے لیے موسم سرما کی جلد اور زیادہ چھٹیوں کی تجویز دی ہے۔

بدھ کے روز جاری کردہ این سی او سی کے ایک بیان کے مطابق وزیر برائے منصوبہ بندی، ترقی و خصوصی اقدام اسد عمر نے ملک میں کورونا وائرس کا جائزہ لینے کے لیے فورم کے ایک اجلاس کی صدارت کی۔

فورم نے تعلیمی اداروں میں وائرس کے بڑھتے ہوئے کیسز پر تبادلہ خیال کیا اور صورتحال سے نمٹنے کے لیے فوری اقدامات کا مطالبہ کیا۔

فورم نے مزید فیصلہ کیا کہ 16 نومبر کو وزیر تعلیم شفقت محمود کی زیرصدارت ملک کے تعلیمی اداروں میں وبائی مرض کی صورتحال کا جائزہ لینے کے لیے خصوصی جائزہ اجلاس منعقد کیا جائے گا۔ بیان میں کہا گیا ہے کہ یہ فورم صوبائی وزارت تعلیم کو بھی بورڈ میں شامل کرے گا۔ اس میں مزید کہا گیا ہے کہ جائزہ اجلاس وائرس کی موجودہ صورتحال کو دیکھنے کے بعد سردیوں کی چھٹیوں کے لیے تعلیمی اداروں کی جلد بندش کا فیصلہ کرے گا۔

بیان میں مزید کہا گیا ہے کہ فورم نے کورونا کے بڑھتے ہوئے تناسب کو مدنظر رکھتے ہوئے طلبا کی حفاظت اور صحت کو یقینی بنانے کے لیے موسم سرما کی چھٹیوں میں توسیع کی تجویز دی ہے۔

گذشتہ ہفتے بین الصوبائی وزرائے تعلیم کی کانفرنس نے موسم سرما کی ابتدائی تعطیلات کے خیال کو رد کردیا تھا۔ وزرا نے وبائی بیماری کے باعث ہونے والے تعلیمی نقصان کو دور کرنے کے لیے تعطیلات نہ کرنے یا ان کو محدود رکھنے کی تجویز پیش کی تھی۔