باجوڑ ایجنسی کے 3 طالب علموں میں کورونا وائرس کا ٹیسٹ مثبت آگیا

باجوڑ ایجنسی کے قبائلی علاقوں میں منگل کے روز 3 طلبا میں کورونا وائرس کا ٹیسٹ مثبت پایا گیا۔

اطلاعات کے مطابق تحصیل سالارزئی میں گورنمنٹ ہائی اسکول پاشات اور گورنمنٹ ہائی اسکول ڈھیرکی کے تین طلباء میں کورونا وائرس کا ٹیسٹ مثبت آیا ہے۔ ان اسکولوں میں کوروناوائرس کے تین کیسز کی اطلاع ملنے کے فوراً بعد ہی اسکولوں کی عمارت کو ڈس انفیکٹ کیا گیا۔

تحصیل میونسپل ایڈمنسٹریشن کے عملے اور اعلیٰ حکام نے بھی کورونا کا نوٹس لیا اور اسکول حکام کو اسکول کی عمارت میں جراثیم کُش ادویات کا چھڑکاؤ کرنے کی ہدایت کی جبکہ پانچ دن تک اسکولوں کو بند رکھنے کی بھی ہدایت کی۔

حکام نے تحصیل میں اس وائرس کے پھیلاؤ کو روکنے کے لیے آٹھویں جماعت کے ان تینوں طلبا کو پانچ دن کی رخصت دے دی ہے۔

ضلعی انتظامیہ نے علاقے کے عوام سے بھی اپیل کی ہے کہ وہ مہلک کورونا وائرس کے پھیلاؤ کو روکنے کے لیے تمام ایس او پیز اور دی گئی ہدایات پر عمل کریں۔