فیڈرل ایجوکیشن رپورٹرز کا انٹرنیشنل اسلامک یونیورسٹی اسلام آباد کا دورہ

اسلام آباد (اے پی پی) فیڈرل ایجوکیشن رپورٹرز ایسوسی ایشن (ایف ای آر اے) کے وفد نے پیر کے روز انٹرنیشنل اسلامک یونیورسٹی، اسلام آباد (آئی آئی یو آئی) کا دورہ کیا۔

صدر ایف ای آر اے ظفر سپرا، چیئرمین ایف ای آر اے ضیغم نقوی اور رکن ایف ای آر اے شاہ خالد ہمدانی کی سربراہی میں وفد نے یونیورسٹی کے ریکٹر ڈاکٹر معصوم یاسین زئی اور قائم مقام صدر ڈاکٹر این بی جمانی سے ملاقات کی۔

ملاقات کے دوران عالمی وبائی مرض اور اس سے متاثر ہوے والے تعلیی امور کے بارے میں بات چیت کی گئی جبکہ کورونا وائرس کے دوران آن لائن تعلیم سے متعلق امور اور آئی آئی یو آئی کی جانب سے تعلیمی عمل کو جاری رکھنے کے معاملے پر تبادلہ خیال کیا گیا۔

اس موقع پر ڈاکٹر معصوم یاسین زئی نے کہا کہ یونیورسٹیز سیکھنے کے اہم ادارے ہیں، تاہم بہت سے لوگ اسے اسکولوں اور اعلیٰ تعلیم کے لیے غیر متنبہ پالیسی سے جوڑ کر کنفیوژن پھیلاتے ہیں جو کہ درست عمل نہیں ہے۔

انہوں نے اس بات کی تائید کی کہ آئی آئی یو آئی نے آن لائن تعلیم کے لیے اپنی ایپکس کمیٹی کے جامع منصوبے کے ذریعے حکومت کے وژن کی روشنی میں قائم رہنما اصولوں پر مکمل عمل درآمد کیا۔

انہوں نے کہا کہ آئی آئی یو آئی نے اپنے طلباء تک پہنچنے اور تعلیمی عمل کو جاری رکھنے کے لئے کوئی کسر نہیں چھوڑی۔ ڈاکٹر این بی جمانی نے کہا کہ کورونا وائرس کے پھیلنے کے بعد سے ہی وہ آن لائن تعلیم کے لیے قائم ایپکس کمیٹی کی سربراہی کر رہے ہیں۔

انہوں نے آگاہ کیا کہ آئی آئی یو آئی نے آن لائن تدریسی عمل کو یقینی بنانے اور امتحانات کے انعقاد میں پائی جانے والی تمام رکاوٹوں کو دور کیا ہے۔ انہوں نے بتایا کہ فیکلٹی ممبرز کے لیے ٹریننگ سیشنز کا انعقاد کیا گیا ہے اور طلباء کی سہولیات کے لیے شروع کی گئی ایل ایم ایس ویب سائٹ کے ذریعے طلباء کے سوالات کے بھی تسلی بخش جوابات دیئے جارہے ہیں۔