امتحانات کے خلاف جاری منظرنامے میں امتحانی پرچہ لیک ہوگیا

ایک نامعلوم شخص نے اے لیول کا اردو کا امتحانی پرچہ آن لائن لیک کردیا اور دھمکی دی ہے کہ جب تک امتحانات منسوخ نہیں کیے جاتے مزید پرچے لیک کردیئے جائیں گے۔

اطلاعات کے مطابق اردو کا سوالیہ پیپر انسٹاگرام ہینڈل کیمبرج ٹیکن ڈاؤن کا استعمال کرتے ہوئے کسی نامعلوم شخص نے امتحان سے ایک روز قبل لیک کیا۔

نامعلوم شخص نے یہ مطالبہ بھی کیا ہے کہ برٹش کونسل اور کیمبرج انٹرنیشنل کے امتحانات (سی آئی ای) موجودہ اے لیول کے امتحانات منسوخ کردیں۔

اے لیول کے ایک طالب علم کے مطابق آفیشل امتحان سے متعلق سوالات اسی طرح کے ہی تھے جو پرچہ سوشل میڈیا پر پوسٹ کیا گیا تھا۔

وفاقی وزیر تعلیم شفقت محمود نے اعلان کیا کہ ملک میں ہونے والے تمام امتحانات 15 جون تک ملتوی کردیئے گئے ہیں۔

انہوں نے ایک ٹوئٹ میں کہا کہ این سی او سی کے فیصلے کی روشنی میں 15 جون تک ملک میں کوئی امتحان نہیں ہوگا۔ اے لیول اور اے ایس کے امتحانات بھی منسوخ کردیئے گئے ہیں۔ ملک میں صرف اے ٹو کا ایک امتحان ہے، جو سخت ایس او پیز کے تحت لیا جائے گا۔