کورونا وائرس: ہیلتھ ڈیپارٹمنٹ نے ہزارہ ڈویژن میں 85 تعلیمی ادارے سیل کردیئے

جمعرات کے روز ہزارہ ڈویژن میں ضلعی انتظامیہ اور محکمہ صحت کے حکام نے متعدد تجارتی پلازوں، ہوٹلوں اور اسکولوں کو سیل کردیا کیونکہ ڈویژن میں 338 نئے کورونا وائرس کیسز کی تصدیق ہوئی ہے۔

محکمہ صحت نے بتایا کہ مانسہرہ ڈویژن کے مختلف اضلاع میں تقریباً 233 افراد میں کورونا وائرس کی تصدیق ہوئی ہے جبکہ ہری پور میں 79، بٹگرام میں 15 اور اپر کوہستان میں 11 افراد میں کورونا ٹیسٹ کے نتائج مثبت آئے ہیں۔

مزید یہ کہ وائرس کے پھیلائو کو روکنے کے لیے حفاظتی اقدامات کے ایک حصے کے طور پر ضلعی انتظامیہ اور محکمہ صحت نے ڈویژن کے 85 تعلیمی اداروں، تین تجارتی عمارتوں اور چھ ہوٹلوں کو سیل کردیا ہے۔ خطے کی ضلعی انتظامیہ نے 30 سے زائد دیہی علاقوں میں بھی اسمارٹ لاک ڈاؤن نافذ کردیا ہے۔

ضلعی حکام نے مزید کہا کہ کووِڈ نائنٹین کی موجودہ دوسری لہر کے دوران محکمہ صحت نے ضلع مانسہرہ میں 15،802 افراد کے ٹیسٹ کروائے جن میں سے 1،429 مثبت آئے ہیں۔