تعلیمی اداروں کی صورتحال کا جائزہ، اجلاس طلب

راولپنڈی: ٹیکسلا اور واہ کینٹ کے نجی تعلیمی اداروں کی نمائندہ تنظیموں کا اہم اجلاس آج منگل کو اسلام آباد میں طلب کر لیا گیاہے جس میں تعلیمی اداروں کی بندش، اسکول مالکان، اساتذہ اور دیگر معاون عملہ کو درپیش مسائل کے حوالے سے مشترکہ لائحہ عمل تیار کیا جائے گا۔

نمائندہ تنظیموں کا مشترکہ اجلاس آج منگل کو شکر پڑیاں کے مقام پر ہو گا۔ جس کی صدارت ناصر محمود سمرا،سابق ممبر بورڈز آف گورنرز فیڈرل بورڈ کریں گے۔ اجلاس میں تعلیمی اداروں کی بندش اور آئندہ کے لئے مشترکہ حکمت عملی کا جائزہ لیا جائے گا۔اجلاس میں موجودہ حالات میں تعلیمی اداروں کی طویل بندش اساتذہ کی مشکلات اور گورنمنٹ کی طرف سے پیکج کے بارے میں غور کیا جائیگا۔

پرائیویٹ ایجوکیشنل سوسائٹی کے صدر حافظ محمد بشارت نے بتایا کہ اجلاس کا مقصد ملک میں کورونا وائرس کے بعد تعلیمی اداروں کو درپیش صورتحال کا جائزہ لینا اور بہتر حل تلاش کرنا ہے، اس حوالے سے تمام متعلقہ ایسوسی ایشنز اور افراد کومطلع کردیا گیاہے۔