ملک میں کورونا کی صورتحال دیکھ کر 11 جنوری کو اسکول دوبارہ کھلنے کا فیصلہ ہوگا، اسد عمر

وفاقی وزیر برائے منصوبہ بندی، ترقیات و خصوصی اقدامات اسد عمر نے کہا ہے کہ اسکولوں کو دوبارہ کھولنے کا فیصلہ اس امر سے مشروط ہے کہ حکومت ملک میں کورونا وائرس کے پھیلاؤ کو روکنے میں کتنی کامیاب ہوگی۔

وزیر اعظم کے معاون برائے صحت ڈاکٹر فیصل سلطان کے ساتھ ساتھ ایک پریس کانفرنس سے خطاب کرتے ہوئے انہوں نے کہا کہ اگر ہم موثر فیصلوں کے ذریعے اس مہلک وائرس کی دوسری لہر پر قابو پاسکیں تو 11 جنوری کو اسکول کھلیں گے۔

اسد عمر نے بتایا کہ وفاقی وزیر تعلیم کی جانب سے پیر کے روز پیش کردہ سفارشات کو قومی رابطہ کمیٹی (این سی او سی) نے منظور کیا ہے۔ ان کا کہنا تھا کہ اسکولوں کا کام جاری رہے گا اور بلا تعطل تعلیم کو آگے بڑھانے کے لیے اور ملک میں تعلیم کے فروغ کے لیے ایک طریقہ کار ترتیب دیا جائے گا، جبکہ صوبے اپنی فزیبلٹی کے مطابق اقدامات کریں گے۔

اس سے قبل پیر کے روز وفاقی وزیر برائے تعلیم شفقت محمود نے کہا تھا کہ تعلیمی اداروں کو بند کرنے کا فیصلہ حکومت کے جاری کردہ کورونا وائرس سے متعلق ایس او پیز پر مکمل عمل در آمد نہ ہونے کی وجہ سے کیا گیا تھا۔ انہوں نے کہا کہ آن لائن تدریس کا عمل 24 دسمبر تک جاری رہے گا۔