پی ایچ ڈی اساتذہ کی کمی: ایچ ای سی نے آئی بی اے کو جرنالزم میں داخلے لینے سے روک دیا

ہائر ایجوکیشن کمیشن (ایچ ای سی) نے پی ایچ ڈی کے اساتذہ کی عدم دستیابی کی وجہ سے انسٹی ٹیوٹ آف بزنس ایڈمنسٹریشن (آئی بی اے) کو ماسٹرز ان جرنلزم میں داخلہ لینے سے روک دیا۔

" جب تک پی ایچ ڈی فیکلٹی نہیں رکھی جائیگی اس وقت تک داخلے لینے سے گریز کریں” ،آئی بی اے کو ایچ ای سی نے ہدایت کی، جس کے بعد یونیورسٹی کے شعبہ صحافت میں داخلے کے عمل کو معطل کردیا گیا۔

آئی بی اے کی ترجمان ملاحت نے بتایا کہ ایچ ای سی کے حکم پر سی ای جے نے ماسٹرز کے داخلے بند کردیئے۔

انہوں نے کہا ، "یہ عمل جلد ہی دوبارہ شروع ہوجائیگا، ہمیں ایک پی ایچ ڈی استاد کی خدمت حاصل ہوگئی ہے، اور ایک استاد ایک سے دو ماہ کے اندر اس شعبے میں شامل ہوجائیں گی”۔

ملاحت نے کہا کہ انڈرگریجویٹ یا ماسٹرز پروگراموں میں داخلہ لینے والے طلباء کے لئے درس و تدریس کا عمل بغیر کسی رکاوٹ کے آگے بڑھے گا۔

یہ محکمہ سابقہ ڈائریکٹر ڈاکٹر عشرت حسین کے دور میں تشکیل دیا گیا تھا جو اب وزیر اعظم کے لئے ادارہ جاتی اصلاحات پر ٹاسک فورس کے سربراہ ہیں۔ محکمہ پاکستانی صحافیوں کو پیشہ ورانہ تربیت فراہم کرتا ہے۔