اسکول کھلیں گے یا بند رہیں گے، اہم فیصلے آج کیے جائیں گے

تعلیم اور صحت کے وزرا کے آج ہونے والے ایک اہم اجلاس میں کورونا وائرس کی تیسری لہر کے درمیان اسکولوں کی حیثیت سے متعلق اہم اعلان کیا جائے گا۔

نیشنل کمانڈ اینڈ آپریشن سینٹر (این سی او سی) ملک میں کورونا وائرس میں تشویشناک حد تک اضافے کے دوران اسکولوں کی بندش کے بارے میں اہم فیصلہ کرے گا۔

اطلاعات کے مطابق ، گذشتہ تین ہفتوں میں کورونا وائرس کے فعال واقعات میں نمایاں اضافہ ہوا ہے جبکہ کچھ گذشتہ دنوں میں کیسز کا مثبت تناسب 8 فیصد سے بڑھ گیا ہے۔

تعلیمی اداروں کی بندش ایک دشوار فیصلہ ہوگا، شفقت محمود

این سی او سی کے اعداد و شمار کے مطابق 6 مارچ کو کورونا کے فعال کیسز کی تعداد 17،352 تھی جو منگل کے روز 34،535 ہوگئی۔

اپنے ٹوئٹر اکاؤنٹ پر بات چیت کرتے ہوئے وفاقی وزیر تعلیم نے عوام کو باور کرایا کہ کورونا وائرس کی تیسری لہر پہلے سے زیادہ سنگین ہے، لہٰذا اس کا محتاط جائزہ لینے کی ضرورت ہے۔

وزیر تعلیم نے لکھا کہ تمام وزرائے تعلیم اور صحت کے وزراٗ بدھ ، 24 مارچ کو این سی او سی میں ملاقات کریں گے تاکہ تعلیمی ادارے کھولنے یا مزید کچھ عرصہ بند کرنے کے بارے میں فیصلہ کیا جاسکے۔

اسکول بند کرنے کا فیصلہ 24 مارچ کو کیا جائے گا، شفقت محمود

ان کا کہنا تھا کہ طلباء، اساتذہ اور عملے کی صحت پر بنیادی طور پر غور کیا جارہا ہے کیونکہ اسکولوں میں کورونا وائرس کا خطرہ پہلے سے کہیں زیادہ پھیل گیا ہے۔ پیر کے روز ایک بیان میں وفاقی وزیرتعلیم شفقت محمود نے کہا تھا کہ تعلیمی اداروں کو بند کرنا ایک سخت فیصلہ ہوگا لیکن این سی او سی کا خیال ہے کہ اسکولوں میں کورونا وائرس کا زیادہ خطرہ ہے۔

انہوں نے کہا کہ ملک بھر میں 50 ملین بچے تعلیم سے وابستہ ہیں اور اگر کوئی انفیکشن ہوجاتا ہے تو یہ بیماری بڑے پیمانے پر پھیل جائے گی۔