سندھ اور کے پی میں موسم سرما کی تعطیلات ختم، تعلیمی ادارے کھل گئے

موسم سرما کی تعطیلات ختم ہونے کے بعد سندھ سمیت کراچی کے تعلیمی ادارے کھول دیے گئے ہیں، وزارت تعلیم کی جانب سے21 دسمبر سے 31 دسمبر تک موسم سرما کی تعطیل کا اعلان کیا گیا تھا۔

محکمہ تعلیم سندھ کے مطابق صوبے کے تمام اسکولز اور کالجز آج سے کھول دیے گئے ہیں جبکہ متعدد پرائیویٹ اسکولوں کی جانب سے 4 جنوری سے تعلیمی ادارے کھولنے کا اعلان کیا گیا ہے۔

پہلے دن مختلف اسکولوں میں حاضری معمول سے بہت کم رہی جبکہ سرکاری اسکولوں میں حاضری 50 فیصد سے بھی کم رہی۔

والدین کا کہنا ہے کہ ابھی کراچی میں ٹھیک سے سردی پڑی نہیں کہ اسکول کھول دیے گئے، جب سخت سردی پڑے گی اس وقت بچے ٹھٹھرتے ہوئے اسکول جائیں گے، مہنگائی کی وجہ سے جیب نے اجازت نہیں دی کہ بچوں کو کہیں گھمانے لے جا سکیں بلکہ بچوں نے نانی، دادی، ماموں اور چچا کے گھر جا کر چھٹیاں انجوائے کیں۔

اسی طرح، خیبر پختونخوا کے میدانی علاقوں میں تمام تعلیمی ادارے سردیوں کی تعطیلات کے بعد کھول دیے گئے ہیں۔ صوبہ بھر کے میدانی علاقوں کے تمام پرائمری اسکولز آج بند ہیں۔

ہر ماہ کی یکم تاریخ کو اساتذہ کی مختلف مضامین میں ٹریننگ کی وجہ سے ایک دن پرائمری اسکولز بند رہتے ہیں، اس مرتبہ یکم جنوری اتوار کے دن آنے پر2 جنوری کو تمام پرائمری اسکولز بند ہیں۔

محکمہ تعلیم نے موسم سرما کی تعطیلات میں توسیع کے بجائے اسکولوں میں حاضری کے اوقات کم کر دیے ہیں۔ محکمہ تعلیم کی طرف سے 31 جنوری تک پرائمری اسکولز اب صبح 9:15 سے 1:30 جبکہ ہائی اور ہائر سیکنڈری اسکولز صبح 9 بجے سے دوپہر 2:30 بجے تک کھلے رہیں گے۔