شفقت محمود کا ایس او پیز پر عملدرآمد کا جائزہ لینے کے لیے مختلف اسکولز کا دورہ

وفاقی وزیرتعلیم شفقت محمود نے کورونا وائرس سے بچائو کے لیے جاری کردہ سرکاری ایس او پیز پر عملدرآمد کا جائزہ لینے کے لیے اسلام آباد کے مختلف اسکولز کا دورہ کیا۔

اس موقع پر انہوں نے کہا کہ یہ ہم سب کی اجتماعی ذمے داری ہے کہ کورونا وائرس کے خلاف احتیاطی تدابیر پر عمل در آمد کو یقینی بنایا جائے۔

وفاقی وزیرتعلیم کا یہ دورہ ملک بھر میں کورونا کے کیسز میں اضافے کے باعث سامنے آیا ہے، گزشتہ روز نیشنل کمانڈ اینڈ آپریشن سینٹر (این سی او سی) نے کورونا کے 543 نئے کیسز رپورٹ کیے تھے جس کے بعد پاکستان میں کورونا کیسز کی تعداد تین لاکھ 12 ہزار 806 ہوگئی ہے۔

یہاں یہ امر قابل ذکر ہے کہ ملک بھر میں تعلیمی اداروں کو دوبارہ کھولنے کے تیسرے مرحلے میں سخت کووِڈ 19 ایس او پیز کے تحت بدھ کے روز پرائمری کلاسز کا دوبارہ آغاز کردیا گیا ہے۔

ملک بھر میں تعلیمی اداروں کو کھولنے کے تیسرے مرحلے میں 30 ستمبر سے پرائمری اسکولز کو کھولنے کا مشترکہ فیصلہ نیشنل کمانڈ اینڈ آپریشن سینٹر (این سی او سی) کے اجلاس میں کیا گیا تھا۔a