وفاقی دارالحکومت میں کووِڈ کیسزمیں اضافے کے بعد مزید تین کالج بند

بذریعہ ٹیم سی جی
|
مارچ 10, 2021
|

وفاقی دارالحکومت میں کووِڈ کیسزمیں اضافے کے بعد مزید تین کالج بند

کورونا وائرس کے کیسز میں اضافے کے باعث وفاقی دارالحکومت میں مزید تین تعلیمی ادارے بند کردیئے گئے ہیں۔

اسلام آباد کے ڈسٹرکٹ ہیلتھ آفیسر زعیم ضیا کے مطابق بند کیے گئے کالجوں میں سے ایک نجی کالج ہے جبکہ دوسرے دو کالج سرکاری ہیں۔ ان کا کہنا تھا کہ جی 6 میں واقع کالج فار گرلز اور آئی 9 میں واقع ماڈل کالج فار بوائز کو عارضی طور پر بند کردیا گیا ہے۔

ڈسٹرکٹ ہیلتھ آفیسر کے مطابق دارالحکومت اسلام آباد میں پانچ تعلیمی ادارے خاص طور پر ان علاقوں میں کورونا وائرس کے کیسز میں اضافے کی وجہ سے بند کردیئے گئے ہیں۔

گذشتہ ہفتے ڈسٹرکٹ ہیلتھ ایڈمنسٹریشن نے دو کالجوں کو کورونا وائرس کے کیسز کی نشاندہی کے بعد بند کردیا تھا۔ بتایا گیا ہے کہ جب سے تعلیمی ادارے دوبارہ کھولے گئے ہیں اور باقاعدہ کلاسز شروع کر رہے ہیں تب سے کورونا کیسز کی تعداد بڑھ رہی ہے۔