امریکا کا پاکستان میں تعلیم کے شعبے میں 19 ملین ڈالرخرچ کرنے کا اعلان

بذریعہ ٹیم سی جی
|
اکتوبر 27, 2022
|

امریکا نے پاکستان میں تعلیم کے شعبے میں 19 ملین ڈالر خرچ کرنے کا اعلان کیا ہے۔ پروگرام کے ذریعے جامعات کی استعداد کار کو بڑھایا جائے گا اور فارغ التحصیل طلباء کے لئے روزگار کے مواقع پیدا کیے جائیں گے۔

اس حوالے سے امریکی ادارے نے اعلیٰ تعلیم کے موضوع پر اسٹرٹیجک ڈائیلاگ کا اہتمام کیا جس میں چیئرمین ایچ ای سی اور پاکستانی جامعات کے وائس چانسلرز نے شرکت کی، ڈائیلاگ میں ہائر ایجوکیشن کی قیادت نے تعلیمی میعار کو بہتر بنانے کے لئے اپنے تجربات سے آگاہ کیا۔

یو ایس ایڈ کی ڈائریکٹر آف ایجوکیشن آفس اینی فلیکر نے کہا کہ ہماری وابستگی سے مسلسل اقتصادی ترقی کی بنیادیں قائم کرنے میں مدد ملے گی،پاکستان میں تعلیمی معیار کی بہتری کے لئے امریکہ نے معاونت کا اعلان کیا ہے۔

ان کا کہنا تھا کہ امریکی ادارے یو ایس ایڈ کے ذریعے 19 ملین ڈالر کی رقم خرچ کی جائے گی، پانچ سالہ پروگرام کے تحت نہ صرف جامعات کی استعداد کار کو بڑھایا جائے گا، بلکہ فارغ التحصیل طلباء کے لئے روزگار کے مواقع بھی پیدا کیے جائیں گے۔ فنڈنگ کے ذریعے پاکستانی یونیورسٹیوں میں قیادت، گورننس اور انتظام کو بہتر بنایا جائے گا۔