پی ایم سی نے پشاور میڈیکل کالج کو ایم بی بی ایس کے لیے 150 سلاٹ دے دیئے

پاکستان میڈیکل کمیشن، اسلام آباد نے پشاور میڈیکل کالج (پی ایم سی) کی خدمات کو تسلیم کرتے ہوئے انسٹی ٹیوٹ کے 15 سالہ ترقی اور کامیابیوں کے سفر کو ایک اور اعزاز سے ہمکنار کیا ہے۔ پشاور میڈیکل کالج کے پہلے سال کے ایم بی بی ایس پروگرام میں 150 نشستوں کے سلاٹ الاٹ کر دیئے گئے ہیں۔

اس اعزاز کی توثیق پی ایم سی کے ڈین پروفیسر ڈاکٹر حفیظ الرحمان کی زیرصدارت پریس بریفنگ میں کی گئی۔ جبکہ پرنسپل پروفیسر ڈاکٹر امان خان، پروفیسر ڈاکٹر عرفان، ڈاکٹر افتخار حسین اور پروفیسر ڈاکٹر سعید انور نے بریفنگ میں شرکت کی۔

ڈاکٹر حفیظ الرحمان نے اس موقع پر کہا کہ پرائم فاؤنڈیشن کے ذریعے قائم کردہ پی ایم سی کو قومی اور بین الاقوامی سطح پر تسلیم کیا ہے۔ ڈاکٹر رحمان نے کہا کہ 10 بیچز میں 1،038 ڈاکٹرز نے پی ایم سی سے گریجویشن مکمل کی ہے، جبکہ 481 میڈیکل گریجویٹس نے ملک اور بیرون ملک ابتدائی اور طبی علوم میں پوسٹ گریجویشن کا داخلہ لیا یا اپنی ڈگری مکمل کی۔ انہوں نے پی ایم سی کی خدمات کو سراہتے ہوئے کہا کہ اس ادارے نے 89.67 فیصد پرسنٹ ایج حاصل کی اور اسے جولائی 2019 میں پاکستان میڈیکل اینڈ ڈینٹل کمیشن کے زیر قیادت ملک گیر تشخیص اور درجہ بندی میں اے پلس (شاندار) پوزیشن حاصل ہے۔

ڈاکٹر حفیظ الرحمان نے نجی میڈیکل کالجز میں پہلی اور صوبہ بھر کے سرکاری و نجی دونوں سطح کے کالجز میں دوسری پوزیشن حاصل کرنے پر انسٹی ٹیوٹ کی تعریف کی۔

پی ایم سی کے ڈین نے کہا کہ پی ایم سی اور پی ڈی سی نے انسٹیٹیوٹ میں انڈرگریجویٹ میڈیکل ریسرچ ڈیپارٹمنٹ قائم کیا ہے اور گذشتہ 11 سال سے باقاعدگی سے سالانہ قومی تحقیقی میلے اور کانفرنسیں منعقد کر رہے ہیں۔

انہوں نے مزید کہا کہ پی ایم سی اور پی ڈی سی متعلقہ قومی ماہرین کی طرف سے تسلیم شدہ دانتوں سے متعلق موضوعات سمیت تمام ابتدائی طبی موضوعات میں دس پوسٹ گریجویٹ پروگرام (ایم فل اور ڈپلومہ) اور سات (ایم فل، ایم ایس سی اور پی ایچ ڈی) کی رہنمائی کررہے ہیں۔