کورونا وائرس سے تعلیم کے شعبے میں عدم مساوات میں اضافہ

کورونا وائرس نے پاکستان میں تعلیمی مواقع میں تفریق اور مستقل عدم مساوات کو جنم دیا، ویبینار حکومت کی طرف سے وبائی امراض کے دوران بچوں کی سہولت کے لیے کوششیں کی گئیں

کورونا وائرس کے بحران نے پاکستان میں تعلیمی مواقع میں فرق اور مستقل عدم مساوات کو جنم دیا ہے جس کے نتیجے میں نہ صرف بڑے پیمانے پر بچوں کے لیے پڑھنے اور سیکھنے کے عمل میں نقصانات ہوسکتے ہیں بلکہ طبقاتی، صنفی، لوکیشن، معذوری اور سماجی پوزیشن کے دیگر مرکزوں میں سیکھنے اور اندراج کا فرق بھی وسیع پیمانے پر پھیل سکتا ہے۔

یہ بیان تعلیم اور قانون سازی کے شعبے سے تعلق رکھنے والی نامور شخصیات کی جانب سے سامنے آیا جب وہ سسٹین ایبل ڈیولپمنٹ گول (ایس ڈی جی ) فور کووڈ نائنٹین اینڈ بلڈنگ بیک بیٹر کے نام سے منعقدہ ویبینار میں اظہارِ خیال کررہے تھے۔

اس ویبینار کا انعقاد ادارہ تعلیم و آگہی (آئی ٹی اے) نے فائونڈیشن اوپن سوسائٹی انسٹیٹیوٹ (ایف او ایس آئی) پاکستان کے تعاون سے کیا تھا۔

ایم این اے مہناز اکبر عزیز نے کووڈ نائنٹین کے بچوں کی تعلیم پر پڑنے والے منفی اثرات پر روشنی ڈالی اور آئندہ کسی بھی بحران کے منفی اثرات کو کم کرنے کے لیے ایک مضبوط نظام کی ضرورت پر زور دیا۔ مقررین کا کہنا تھا کہ کورونا وائرس کے بحران نے پاکستان میں تعلیمی مواقع میں تفریق اور مستقل عدم مساوات کو جنم دیا ہے جس کے نتیجے میں نہ صرف بڑے پیمانے پر بچوں کے لیے پڑھنے اور سیکھنے کے عمل میں نقصانات ہوسکتے ہیں بلکہ طبقاتی اور صنفی بنیاد پر بچوں کے لیے سیکھنے اور اندراج کا فرق بھی وسیع پیمانے پر پھیل سکتا ہے۔

کورونا وائرس کے باعث پاکستان میں 39.6 ملین پری پرائمری، پرائمری اور سیکنڈری طلبہ متاثر ہوئے ہیں جبکہ وفاقی وزارت تعلیم اور صوبائی ایجوکیشن ڈیپارٹمنٹ کے ابتدائی ردعمل میں ٹیلی اسکول، تعلیم گھر اور لرننگ ایپس جیسے فاصلاتی تعلیم کے حل کی جانچ کی گئی۔

وفاقی وزارت تعلیم کی تکنیکی مشیر عنبرین عارف نے وبائی امراض کے دوران بچوں کی سہولت کے لئے حکومت کی طرف سے کی جانے والی کوششوں پر روشنی ڈالی، ان کا کہنا تھا کہ ملک کے تعلیمی نظام کو بہتر بنانے کے حکومتی منصوبے جاری و ساری ہیں۔