نصاب میں قرآن پاک کو مع ترجمہ شامل کرنے کی درخواست مسترد

بذریعہ ٹیم سی جی
|
دسمبر 16, 2022
|

سندھ ہائی کورٹ نے پرائمری سے کالج تک نصاب میں ترجمے کے ساتھ قرآن پاک شامل کرنے کی درخواست مسترد کر دی۔

عدالتِ عالیہ نے اس حوالے سے اپنے فیصلے میں کہا ہے کہ آئین میں عدلیہ، مقننہ اور انتظامیہ کے درمیان توازن رکھا گیا ہے۔

سندھ ہائی کورٹ کے فیصلے کے مطابق بنیادی حقوق کی خلاف ورزی نہ ہو تو عدالت نصاب کی تبدیلی کا حکم نہیں دے سکتی۔

فیصلے میں عدالت کا کہنا ہے کہ ہماری نظر میں ایمان کا معاملہ ذاتی ہے، اس میں مداخلت نہیں کی جا سکتی۔

اپنے فیصلے میں سندھ ہائی کورٹ نے کہا ہے کہ آئین منفی اور مثبت دونوں طرح کے حقوق دیتا ہے، منفی حقوق ریاست کو پابند کرتے ہیں کہ شہریوں کے ذاتی معاملات میں مداخلت نہ کی جائے۔

عدالتِ عالیہ کا فیصلے میں مزید کہنا تھا کہ شہری اپنے حقوق کو اپنی مرضی کے مطابق استعمال کر سکتا ہے، آئین کا آرٹیکل 20 شہریوں کو مذہبی آزادی دیتا ہے۔

سندھ ہائی کورٹ نے فیصلے میں یہ بھی کہا ہے کہ آئین ریاست کو پابند بناتا ہے کہ کسی کے مذہبی معاملات میں مداخلت نہ کرے۔