میکسیکو میں اسکول کے 57 طالب علموں کو زہر دے دیا گیا

بذریعہ ٹیم سی جی
|
اکتوبر 24, 2022
|

میکسیکو میں اسکول کے 57 طالب علموں کو زہر دے دیا گیا

میکسیکو کے ایک اسکول میں درجنوں طالب علموں کو پرسرار طور پر زہر دیا گیا۔ غیر ملکی خبر رساں ادارے کے مطابق یہ افسوسناک واقعہ جنوبی میکسیکن ریاست چیاپاس میں پیش آیا جہاں ایک سیکنڈری اسکول میں پراسرار طور پر57 طالب علموں کو زہر دیا گیا ہے جس کے بعد طلبا کی حالت غیر ہونے پر انہیں فوری ہسپتال منتقل کیا گیا۔

رپورٹس کے مطابق گزشتہ دو ہفتوں کے دوران چیاپاس کے اسکولوں میں بچوں کو اتنی بڑی تعداد میں زہر دینے کا یہ تیسرا واقعہ ہے، اسکول انتظامیہ کا کہنا ہے کہ فی الحال پتہ نہیں لگایا جاسکا کہ بچوں کو زہر کس نے اور کس طرح دیا ہے البتہ والدین خدشہ ظاہر کررہے ہیں کہ بچوں نے شاید زہریلا پانی پیا ہوگا یا کھانا کھایا ہوگا۔ اس کے علاوہ والدین کی جانب سے اسکول انتظامیہ کے خلاف احتجاج بھی کیا گیا جس پر انتظامیہ نے واقعے کی فوری تحقیقات کی یقین دہانی کرائی ہے۔

دوسری جانب ہسپتال انتظامیہ کا کہنا ہے کہ ایمرجنسی میں لائے گئے ایک طالب علم کی حالت غیر ہے جبکہ دیگر تمام طالب علموں کی صحت اطمینان بخش ہے۔