سندھ میں اساتذہ کی بھرتی سے متعلق پالیسی میں تبدیلی

بذریعہ ٹیم سی جی
|
دسمبر 06, 2022
|

سندھ میں اساتذہ کی بھرتی سے متعلق پالیسی میں تبدیلی کردی گئی، جس کے تحت نئے بھرتی ہونے والے اساتذہ کی ترقی کے بعد ان کا کیڈر تبدیل نہیں ہوگا۔

تفصیلات کے مطابق محکمہ تعلیم سندھ کی ٹیچرز بھرتی کی پالیسی میں تبدیلی کردی گئی ہے، جس کے تحت گزشتہ سال بھرتی ہونے والے 45 ہزار اساتذہ کی ترقی کے بعد ان کا کیڈر تبدیل نہیں ہوگا۔

نئی پالیسی میں کہا گیا ہے کہ پرائمری اسکول ٹیچر کو پروموشن کے بعد چیف اسکول ٹیچر تعینات کیا جائے گا جبکہ پرائمری اور جونیئر اسکول ٹیچر ترقی کے بعد ہائر اسکول ٹیچر نہیں بن سکیں گے۔

پالیسی کے مطابق نئے 14 گریڈ میں بھرتی جے ایس ٹی اور پی ایس ٹی کے لئے نئی پوزیشن مقرر کی جائے گی، اساتذہ کو ترقی کے بعد 16 یا 17 گریڈ میں چیف ٹیچر کی پوزیشن ملے گی۔

نئےبھرتی ہونے والے اساتذہ کے 3 سال تک دوسرے اضلاع میں تبادلے پر بھی پابندی عائد ہوگی۔