ایبٹ آباد بورڈ کے میٹرک کے پرچے لیک کرنے والا ملزم گرفتار

بذریعہ ٹیم سی جی
|
ستمبر 26, 2022
|

وفاقی تحقیقاتی ادارے (ایف آئی اے) نے ایبٹ آباد بورڈ کے میٹرک کے پرچے لیک کرنے والے ملزم کو گرفتار کرلیا۔

ایکسپریس نیوز کے مطابق فیڈرل انوسٹی گیشن ایجنسی (ایف آئی اے) کے سائبر کرائم سرکل ایبٹ آباد نے میٹرک کے پیپر لیک کرنے والے ملزم کے خلاف کارروائی کرتے ہوئے ملزم محمد نصیر کو دھر لیا۔

ملزم محمد نصیر ایبٹ آباد میں واقعے نجی کالج کا مالک ہے جس نے ایبٹ آباد بورڈ کے میٹرک کے 22 پیپرز لیک کیے تھے۔

ایف آئی اے نے پرچے لیک کرنے کے معاملے پر مقدمے میں نامزد گیارہ ملزمان کو گزشتہ ماہ گرفتار کیا تھا۔

گرفتار ملزم نے بدعنوانی اور دھوکہ دہی کے ارادے سے امتحانی پرچوں کے اسکرین شاٹس حاصل کیے اور واٹس ایپ کے ذریعے پیپرز کو لیک کیا۔

وفاقی تحقیقاتی ادارے کے حکام کا کہنا ہے کہ ملزم کے خلاف سائبر کرائم سرکل ایبٹ آباد میں پیکا ایکٹ کے تحت مقدمہ درج تھا، مقدمے میں ضمانت منسوخ ہونے پر ملزم کو گرفتار کیا گیا جب کہ پیپرز لیک کرنے کے حوالے سے مزید تفتیش جاری ہے۔