چارلس ڈارون کا نایاب قلمی نسخہ 8 لاکھ ڈالرز میں فروخت ہوگا

بذریعہ ٹیم سی جی
|
اکتوبر 26, 2022
|

مشہور برطانوی سائنس دان اور نظریہ ارتقا کے بانی چارلس ڈارون کے ہاتھ سے لکھے ہوئے انتہائی نایاب قلمی نسخے کی فروخت آئندہ ماہ 8 لاکھ ڈالرز میں متوقع ہے۔

میڈیا رپورٹس کے مطابق یہ نایاب دستاویز ڈارون کے شہرہ آفاق کتاب ’اورِجن آف اسپیشیز‘ کے خلاصے پر مبنی ہے۔ چارلس ڈارون کی یہ کتاب ارتقائی حیاتیات کی بنیاد سمجھی جاتی ہے۔

چارلس ڈارون نے یہ خلاصہ اپنی کتاب کے تیسرے ایڈیشن کے چھپنے کے چار سال بعد 1865 میں ایک میگزین کے ایڈیٹر ہرمن کِنڈٹ کو بھیجا تھا۔

دستاویز میں لکھا ہے کہ ’میں نے ان تمام اہم باتوں کا خلاصہ کیا ہے جنہوں نے مجھے باور کروایا کہ اس زمین پر موجود جاندار اپنے تحفظ یا فطری انتخاب کے سبب ہونے والی معمولی تبدیلیوں کے ساتھ ارتقاء کے مرحلے سے گزرے ہیں۔

دستاویز کو نایاب قرار دینے والے سُوتھ بائز آکشن ہاؤس کا کہنا تھا کہ پہلے اس دستاویز کو کتاب کے تیسرے ایڈیشن کا ایک ورق سمجھا جاتا تھا لیکن بعد ازاں اس کی شناخت ہرمن کِنڈٹ کو بھیجے گئے رقعے کے طور پر ہوئی۔

یہ دستاویز 25 نومبر سے 9 دسمبر تک جاری رہنے والی نیلامی میں فروخت کی جائے گی۔ سُوتھ بائیز نے اس نیلامی کو 19 ویں صدی کی سائنس اور ثقافت سے منسوب کرتے ہوئے اس کا نام ’ایج آف ونڈر‘ رکھا ہے۔