سندھ حکومت کی صوبے بھر کے مدارس میں تعلیمی سرگرمیاں بند رکھنے کی ہدایت

حکومت سندھ نے جمعرات کے روز جاری کردہ ایک نوٹیفکیشن میں صوبہ بھر کے تمام دینی مدارس کو بند کرنے کی ہدایت کی۔

صوبائی حکومت کی جاری کردہ ہدایات کے مطابق کسی بھی انسٹی ٹیوٹ کی جانب سے سرکاری احکامات اور ہدایات پر عمل کرنے میں ناکام ہونے کی صورت میں اس کے خلاف قانونی کارروائی کی جائے گی۔

سندھ حکومت کی جانب سے نوٹیفکیشن صوبے میں کووڈ انفیکشنز اور اموات کے بڑھتے ہوئے معاملات کے پیش نظر جاری کیا گیا۔ اعدادوشمار کے مطابق 25،000 سے زائد افراد کو کورونا وائرس کا انفیکشن ہونے کی اطلاع ملی ہے جبکہ انفیکشن کی وجہ سے 300 سے زائد افراد ہلاک ہو گئے ہیں۔

وفاقی حکومت نے وائرس کے پھیلاؤ کو روکنے کے لیے 26 نومبر سے 11 جنوری تک ملک بھر میں تمام تعلیمی اداروں کو بند رکھنے کا اعلان کیا تھا۔

حکومت کی جاری کردہ ہدایات کے مطابق طلباء گھر پر ہی تعلیم حاصل کریں گے اور 24 دسمبر تک ہفتہ وار ہوم ورک حاصل کریں گے۔ جبکہ طلبہ کے لیے موسم سرما کی تعطیلات 25 دسمبر سے شروع ہوں گی۔

وفاقی وزیر تعلیم نے کہا ہے کہ اسکولوں کو دوبارہ کھولنے سے متعلق فیصلہ ملک میں کورونا وائرس کی صورتحال کا جائزہ لینے کے بعد کیا جائے گا۔

دریں اثنا ملک بھر میں داخلہ اور بھرتی ٹیسٹ کے علاوہ تمام امتحانات ملتوی کردیئے گئے، مزید یہ کہ سندھ نے انڈور ڈائننگ پر پابندی عائد کردی ہے اور بازاروں، دکانوں اور شاپنگ مالز کو کھلا رکھنے کے لیے محدود اوقات کی اجازت دی ہے۔ تاہم، کچھ شہروں میں اسمارٹ لاک ڈاؤن کی حکمت عملی پر عمل کیا جا رہا ہے۔