امیدواروں کی جانب سے ’غلطی‘ کی نشاندہی، پی ایم سی، ایم ڈی کیٹ کے نتائج دوبارہ جاری کرے گا

بذریعہ ٹیم سی جی
|
دسمبر 16, 2020
|

پاکستان میڈیکل کمیشن (پی ایم سی) نے بدھ کے روز (آج) اعلان کیا ہے کہ وہ امیدواروں کی جانب سے غلطیوں کی نشاندہی کی وجہ سے ایم ڈی کیٹ 2020 کے نتائج دوبارہ جاری کرے گا۔

پی ایم سی نے ایک بیان میں کہا ہے کہ کچھ طلباء کو امتحان میں غلطی سے غیر حاضر قرار دیا گیا ہے جس کی شکایات سامنے آنے کی وجہ سے ایم ڈی کیٹ برائے 2020 کے نتائج پر نظرثانی کی جا رہی ہے۔

پی ایم سی کا کہنا ہے کہ کمیشن جلد ہی اپنی ویب سائٹ پر اپ ڈیٹڈ نتائج کو دوبارہ جاری کرے گا۔

پی ایم سی نے یہ بھی بتایا کہ کمیشن نے کمپیوٹر سے جاری ہونے والے نتائج پر کسی بھی تضاد کی جانچ کرنے کے لیے اپنے نظام کو آف لائن بنا دیا ہے۔ پی ایم سی کی ریگولیٹری باڈی نے طلبہ کو بھی یقین دلایا ہے کہ غلطی کی جانچ پڑتال کے ساتھ ہی کمیشن کی ویب سائٹ پر نتائج کو لائیو کردیا جائے گا۔

پی ایم سی نے منگل کو رات گئے ایم ڈی کیٹ کے نتائج کا اعلان کیا تھا جبکہ آج صبح پی ایم سی نے باضابطہ اعلان کیا تھا کہ ایم ڈی کیٹ کے امتحان میں 121،181 طلباء نے حصہ لیا تھا۔ ان میں سے 67،611 طلباء پاس ہوئے، یعنی انہوں نے 60 فیصد سے زیادہ نمبر حاصل کیے۔