خود کو ڈگری کا تصدیقی ایجنٹ ظاہر کرنے والوں کے خلاف ایچ ای سی کا انتباہ

بذریعہ ٹیم سی جی
|
اپریل 23, 2021
|

ہائر ایجوکیشن کمیشن (ایچ ای سی) نے عوام کے سامنے خود کو ڈگری کے تصدیقی ایجنٹوں کے طور پر پیش کرنے والے افراد کے بارے میں انتباہ جاری کیا ہے۔

ایچ ای سی نے بتایا کہ ہائر ایجوکیشن کمیشن کے علم میں یہ بات آئی ہے کہ کچھ لوگ خود کو 'ایجنٹوں' کے طور پر پیش کرتے ہیں تاکہ وہ درخواست دہندگان کی ڈگریوں اور نقلوں (ٹرانسکرپٹس) کی تصدیق کرنے میں مدد کریں اور یوں وہ سادہ لوح عوام کے ساتھ دھوکہ کررہے ہیں۔

ایچ ای سی کے مطابق کچھ کیسز میں یہ بھی سامنے آیا ہے کہ ایسے افراد ایچ ای سی کی جعلی مہروں یا ٹکٹوں کو اصل ڈگریوں اور ٹرانسکرپٹس پر لگا کر درخواست گزاروں کو دھوکہ دیتے ہیں۔

خود کو ڈگری کا تصدیقی ایجنٹ ظاہر کرنے والوں کے خلاف ایچ ای سی کا انتباہ

ایچ ای سی نے متنبہ کیا ہے کہ اگر ایسی ڈگریوں اور ٹرانسکرپٹس کو جعلی ڈاک ٹکٹوں کے ساتھ ایچ ای سی کو بھیجا گیا تو یہ دستاویزات ضبط کرلی جائیں گی۔

ایچ ای سی کے جاری کردہ نوٹیفکیشن میں مزید کہا گیا ہے کہ تمام متعلقہ افراد کو اس سلسلے میں انتہائی احتیاط برتنے اور ممکنہ طور پر جعلساز ایجنٹوں کو ملوث کرنے کے بجائے مخصوص تصدیقی پروٹوکول پر عمل کرنے کے لیے مطلع کیا جاتا ہے۔