ملک کے بیشتر شہروں میں تعلیمی ادارے دوبارہ بند

کورونا کیسز میں ہونے والے حالیہ اضافے کو مدنظر رکھتے ہوئے پنجاب کے سات شہروں سمیت پشاور اور اسلام آباد میں تمام تعلیمی ادارے پیر کے روز سے دو ہفتوں کے لیے بند رہیں گے۔

ریڈیو پاکستان کے مطابق پنجاب کے وہ شہر جہاں دو ہفتے تک بہار کی تعطیلات منائی جارہی ہیں ان میں فیصل آباد، گوجرانوالہ، لاہور، گجرات، سیالکوٹ، ملتان اور راولپنڈی شامل ہیں۔

وفاقی وزیر تعلیم شفقت محمود نے گذشتہ ہفتے اعلان کیا تھا کہ فیصل آباد، گوجرانوالہ، لاہور، گجرات، ملتان، راولپنڈی اور سیالکوٹ کے تعلیمی ادارے موسم بہار کی تعطیلات کے لیے 15 مارچ سے 28 مارچ تک بند رہیں گے۔

موجودہ صورتحال پر تبصرہ کرتے ہوئے انہوں نے کہا اچھی خبر یہ ہے کہ سندھ اور بلوچستان میں صورتحال نسبتاً بہتر ہے یہی وجہ ہے کہ وہ (معمول کے مطابق) اپنا کام جاری رکھ سکتے ہیں۔