دنیا میں تعلیم حاصل کرنے کے لیے 10 بہترین شہر کون سے ہیں؟

دنیا میں تعلیم حاصل کرنے کے لیے 10 بہترین شہر کون سے ہیں؟

دنیا بھر میں تعلیم حاصل کرنے کے لیے بہترین شہروں کی درجہ بندی میں ایک بار پھر برطانیہ کا دارالحکومت لندن پہلے نمبر پر ہے۔

برطانوی فرم کیو ایس کی جانب سے جاری کردہ رواں سال کی درجہ بندی کے مطابق ایشیا میں طلبا کے لیے سب سے بہترین شہر جنوبی کوریا کے دارالحکومت سیول کو قرار دیا گیا ہے جو عالمی درجہ بندی میں بھی لندن اور جرمنی کے شہر میونخ کے بعد تیسرے نمبر پر ہے۔

دوسری جانب اس درجہ بندی میں پاکستان کا کوئی شہر شامل نہیں جب کہ انڈیا کے چار شہر موجود ہیں۔ اہم بات یہ ہے کہ لاطینی امریکہ کے تین شہر پہلی بار اس فہرست میں جگہ بنانے میں کامیاب ہوئے ہیں۔

کیو ایس رینکنگ میں شمولیت کی کیا شرط ہے؟

اس فہرست میں صرف ایسے شہر ہی شامل ہو سکتے ہیں جن کی آبادی ڈھائی لاکھ سے زیادہ افراد پر مشتمل ہو اور اس شہر میں کم از دو ایسی یونیورسٹیاں موجود ہوں جو اسی کنسلٹنٹ کی یونیورسٹی کی رینکنگ میں پہلے سے موجود ہوں۔

اس کے علاوہ یہ بھی جانچا جاتا ہے کہ اس شہر میں کتنے طالب علم ہیں اور ان میں سے کتنے بیرون ملک سے تعلق رکھتے ہیں۔

اس کے ساتھ ساتھ رینکنگ میں شامل ہونے والے شہروں کے بارے میں دیکھا جاتا ہے کہ وہ کس حد تک محفوظ ہیں، ایک طالب علم کے رہنے کا خرچہ کس حد تک ہوتا ہے اور کیا اس شہر میں ملازمت کے مواقع بھی موجود ہیں یا نہیں۔

اس رینکنگ کے مطابق برطانیہ کا دارالحکومت لندن، جسے دنیا بھر میں پہلا درجہ دیا گیا ہے، ’ایک متنوع اور ثقافت سے بھرپور شہر ہے جہاں دنیا بھر سے آنے والے طلبا کو عالمی شہرت یافتہ میوزیمز سے لے کر مختلف ثقافتوں کے ذائقے دار پکوان تک میسر ہیں۔

لندن میں دنیا کے کئی نامی گرامی تعلیمی ادارے موجود ہیں جیسا کہ کنگز کالج لندن اور یونیورسٹی کالج لندن وغیرہ۔

لندن کے بعد میونخ اور جنوبی کوریا کا شہر سیول ہیں جن کی گذشتہ رینکنگ میں بھی یہی پوزیشن تھی اور وہ اسے برقرار رکھنے میں کامیاب ہوئے ہیں۔

سوئٹزر لینڈ کا زیورچ اور آسٹریلیا کا شہر میلبورن دنیا بھر میں تعلیم حاصل کرنے کے لیے بہترین شہروں کی درجہ بندی میں بالترتیب چوتھے اور پانچویں نمبر پر ہیں۔ اہم بات یہ ہے کہ دنیا کے پہلے دس بہترین شہروں میں امریکہ کا ایک بھی شہر شامل نہیں۔ امریکی شہر بوسٹن اس درجہ بندی میں 11 نمبر پر ہے۔

ایشیا کے کون کون سے شہر اس درجہ بندی میں شامل ہیں؟

کیو ایس رینکنگ کی درجہ بندی میں دنیا بھر کے تقریبا 140 شہر شامل ہیں جن میں پاکستان کا ایک بھی شہر شامل نہیں ہے۔

لیکن اگر ہم پورے ایشیا کی بات کریں تو سیول اور ٹوکیو کے علاوہ پہلے 50 شہروں میں ایشیا کے کئی شہر موجود ہیں۔

ان میں ہانگ کانگ کا 12 واں نمبر ہے اور سنگا پور کا 13 واں جبکہ کوالالمپور اور چین کا دارالحکومت بیجنگ 28 اور 29 ویں نمبر پر موجود ہیں۔

ان کے علاوہ تائیوان کا تائپے 31 اور چین کا شہر شنگھائی 36 ویں نمبر پر موجود ہے جب کہ دبئی اور ترکی کا شہر استنبول 51 اور 52 ویں نمبر پر ہیں۔

دوسری جانب پاکستان کے ہمسایہ ملک بھارت کے چار شہر اس فہرست میں موجود ہیں جن میں ممبئی 103، بنگلور 114، چنئی 125 اور دلی 129 ویں پوزیشن پر ہیں