یونیورسٹی آف ساہیوال

اسٹوڈنٹس میں پیشہ ورانہ صلاحیتیں اجاگر کرنے اور انہیں جدید زمانے کے تقاضوں سے ہم آہنگ کرنے کے لیے 2016 میں یونیورسٹی آف ساہیوال کا قیام عمل میں آیا۔ اپنے قیام کے دو سال کے اندر ہی اس نامور تعلیمی ادارے میں جدید تصورات اور دریافتوں کے ذریعے تعلیم و تربیت کے میدان میں کئی تبدیلیاں لائی گئیں۔ یونیورسٹی کی انتظامیہ کا کہنا ہے کہ اسٹوڈنٹس کو بہترین تعلیم و تربیت سے آراستہ کرکے ان کے مستقبل کو نکھارنا اس تعلیمی ادارے کا اہم مقصد ہے جس پر عمل کرتے ہوئے یہاں پڑھنے والے سبھی اسٹوڈنٹس پر انفرادی توجہ دی جاتی ہے اور پرفیکٹ کلاس مینیجمنٹ سٹم کے ذریعے انہیں مستقبل کے چینلجز سے نمٹنے کے لیے اعلیٰ اور معیاری تعلیم فراہم کی جاتی ہے۔ یونیورسٹی آف ساہیوال میں صبح اور شام کی شفٹ میں پڑھائی ہوتی ہے تاکہ وہ اسٹوڈنٹس بھی اعلیٰ تعلیم حاصل کرسکیں جو کسی وجہ سے صبح یا شام کی شفٹ میں پڑھنے سے قاصر رہتے ہیں۔ اس یونیورسٹی کا فِیس اسٹرکچر بھی معقول ہے جس کے باعث ساہیوال اور اس کے مضافات میں رہنے والے اسٹوڈنٹس کے لیے اعلیٰ تعلیم کا حصول سہل ہوگیا ہے۔ یونیورسٹی آف ساہیوال ہر سال اسٹوڈنٹس کو مختلف اسکالر شپس بھی دیتی ہے۔