یونیورسٹی آف واہ

یونیورسٹی آف واہ ایک پرائیویٹ ہائیر ایجوکیشن انسٹیٹیوٹ ہے جس کا مقصد ہر قسم کے تعصبات سے بالا تر ہو کر تعلیم حاصل کرنے کے خواہش مند ہر فرد کو عمدہ تعلیم فراہم کرنا ہے۔ اس یونیورسٹی کے چارٹر کی منظوری پنجاب اسمبلی سے 2009 میں دی گئی۔ یہاں ہائیرایجوکیشن کمیشن سے منظور شدہ 4 سالہ بیچلرز اور 2 سالہ ماسٹرز ڈگری پروگرام پڑھائے جاتے ہیں۔ بیسک ایجوکیشن، سوشل سائنسز، کمپیوٹر سائنسز، مینیجمنٹ سائنسز اور انجینئرنگ کے شعبوں میں یہاں سے گریجویشن اور ماسٹرز کی ڈگری حاصل کی جاسکتی ہے۔ اس یونیورسٹی میں دو کالجز بھی علم کی روشنی بانٹنے پر مامور ہیں ان میں واہ انجینئرنگ کالج (ڈبلیو ای سی) اور مشعل ڈگری کالج (ایم ڈی سی) شامل ہیں۔ واہ انجینئرنگ کالج میں سِول، کیمیکل، مکینیکل اور میکٹرونکس انجینئرنگ کے شعبوں میں بی ایس سی اور ایم ایس پروگرام پڑھائے جاتے ہیں جبکہ الیکٹریکل انجینئرنگ میں پی ایچ ڈی بھی کرائی جاتی ہے۔ یہاں الیکٹریکل اور مکینیکل انجینئرنگ ٹیکنالوجی کے شعبے میں بی ایس سی بھی کرائی جاتی ہے۔ یہ یونیورسٹی صبح 8 بجے سے لے کر رات ساڑھے 8 بجے تک کھلی رہتی ہے۔ پاکستان کے علاقے واہ کا یہ امتیاز ہے کہ پورے ایشیا میں اس علاقے میں شرح خواندگی سب سے زیادہ ہے۔ یہاں رہنے والے افراد میں تعلیم حاصل کرنے کا تناسب 100 فیصد تک ہے۔