پنجاب تیانجن یونیورسٹی آف ٹیکنالوجی ، لاہور

حکومتِ پاکستان کے طویل المدتی ویژن پلان 2025 کے تحت پاکستان کے اہم شعبہ جات کو ترقی دے کر ملک کو دورِ جدید کے تقاضوں سے ہم آہنگ کیا جائے گا جس سے پاکستان کی ایک ترقی یافتہ ملک بننے کی راہ ہموار ہوگی۔ مئی 2017 کو جب وزیراعلیٰ پنجاب چین کے دورے پر تیانجن گئے تو چینی حکام اور وزیراعلیٰ پنجاب کے درمیان ایک فریم ورک ایگریمنٹ پر دستخط کیے گئے جس کے مطابق چین کی تیانجن یونیورسٹیز اور پاکستان کی پنجاب حکومت کے اشتراک سے پنجاب میں تیانجن یونیورسٹی آف ٹیکنالوجی قائم کی جائے گی۔ نومبر 2017 کو اس خواب کو تعبیر دی گئی اور لاہور میں تیانجن یونیورسٹی آف ٹیکنالوجی کے قیام کی بنیاد رکھی گئی جو کہ پاکستان میں اپنی نوعیت کی پہلی درس گاہ ہے جہاں گریجویشن لیول پر ٹیکنیکل اور ووکیشن ٹریننگ دی جاتی ہے۔ تیانجن یونیورسٹی آف ٹیکنالوجی میں انٹرنیشنل مارکیٹ کی ضروریات کے مطابق تعلیم و تربیت اور صلاحیتوں سے مالا مال پروفیشنلز کو تیار کیا جاتا ہے۔