گورنمنٹ کالج یونیورسٹی

لاہور میں واقع گورنمنٹ کالج یونیورسٹی کو جی سی یو کے مختصر نام سے بھی جانا جاتا ہے، 1864 میں اپنے قیام کے بعد سے یہ ادارہ تعلیم کے فروغ کے لیے اپنی گو ناگوں کاوشوں کے باعث آج جنوبی ایشیا کا نمائندہ ترین تعلیمی ادارہ بن چکا ہے۔ اس ادارے کو یہ اعزاز حاصل ہے کہ پاکستانی قوم کے روحانی باپ، حکیم الامت، شاعرِ مشرق حضرت علامہ محمد اقبال نے بھی اس ادارے سے تعلیم حاصل کی۔ اس کے علاوہ اس ادارے کو ایک اور اعزاز بھی حاصل ہے کہ نوبل انعام حاصل کرنے والی دنیا کی دو اہم شخصیات ہرگوبند کھرانہ اور ڈاکٹر عبدالسلام اس ادارے کے ماضی کے ساتھیوں میں شامل ہیں۔ اس ادارے کے منتظمین کا کہنا ہے کہ ہمارے طلباء ، چاہے وہ نئے ہوں یا پرانے، پاکستان کے معاشرے اور ثقافت کی تشکیل اور ترقی میں بھر پور تعاون کر رہے ہیں۔