کوہاٹ یونیورسٹی آف سائنس اینڈ ٹیکنالوجی

پاکستانی صوبے خیبرپختونخوا کے ضلع کوہاٹ میں واقع کوہاٹ یونیورسٹی آف سائنس اینڈ ٹیکنالوجی ایک پبلک یونیورسٹی ہے۔ اس ادارے کو 2001 میں قائم کیا گیا اور اس کا افتتاح اُس وقت کے گورنر خیبرپختونخوا لیفٹیننٹ جنرل (ر) سید افتخار حسین شاہ نے کیا تھا۔ اس یونیورسٹی میں ابتدا میں چار انسٹیٹی ٹیوٹس قائم کئے گئے تھے جن میں انسٹیٹیوٹ آف انفارمیشن ٹیکنالوجی، انسٹیٹیوٹ آف مینیجمنٹ سائنسز، انسٹیٹیوٹ آف ایجوکیشن اینڈ ریسرچ اور ڈیپارٹمنٹ آف مائیکروبیالوجی شامل ہیں۔ 2004 میں کوہاٹ یونیورسٹی میں ان چاروں شعبوں میں دو سال اور چال سال کے بیچلر ڈگری اور دو سال کا ماسٹر ڈگری پروگرام شروع کیا گیا۔ بعد میں یہاں فزکس، کیمسٹری، باٹنی، زولوجی اور مائیکرو بیالوجی کے ڈیپارٹمنٹس کا اضافہ کیا گیا۔ یہاں زولوجی کا ڈیپارٹمنٹ ڈاکٹر فرزانہ پروین کی کوششوں سے قائم کیا گیا۔ کوہاٹ یونیورسٹی کے تمام ڈیپارٹمنٹس میں بی ایس آنرز، ایم ایس سی، ایم فِل اور پی ایچ ڈی کے ڈگری پروگرامز پڑھائے جاتے ہیں۔