انسٹیٹیوٹ آف اسپیس ٹیکنالوجی

گذشتہ صدی کئی تکنیکی ترقیوں کی میزبان رہی ہے جس کے نتیجے میں انسانی سماج کی بہتری کی طرف بتدریج ترقی ہوئی ہے۔ اس ترقی کے ثمرات خلائی سائنس کے شعبے میں بھی نظر آئے ہیں جس نے انسانی ترقی کو مزید بلندیوں سے ہمکنار کیا ہے اور اس پیش قدمی کے پیچھے ایک اہم قوت کے طور پر کردار ادا کیا ہے۔ خلائی سائنس نے انسانی سماج کی ترقی کے عمل میں انقلاب برپا کردیا ہے۔ اسلام آباد میں واقع انسٹیٹیوٹ آف اسپیس ٹیکنالوجی کو آئی ایس ٹی کے نام سے بھی جانا جاتا ہے۔ یہ ملک کا ایک اہم ادارہ ہے جہاں ایرو اسپیس انجینئرنگ، آسٹرونومی، فلکیات اور خلانوردی جیسے علوم کے شعبوں میں تعلیم دی جاتی ہے۔ پاکستان نیشنل اسپیس ایجنسی کی استدعا پر 2002 میں اس ادارے کا قیام عمل میں لایا گیا۔ آئی ایس ٹی کا الحاق بیجنگ یونیورسٹی اور یونی ورسٹی آف سرے سے ہے جس کے تحت یہاں پڑھنے والے طلبا کو انڈر گریجویٹ اور گریجویٹ کی ڈگری تفویض کی جاتی ہے. تعلیم کا بہترین معیار قائم کرنے پر 2008 سے آئی ایس ٹی کو آئی ایس او سرٹیفائیڈ فہرست میں شامل کیا گیا ہے۔ اسلام آباد کے مضافات میں قائم یہ شاندار ادارہ 73 ایکڑ کے وسیع و عریض رقبے پر پھیلا ہوا ہے۔ جہاں ہزاروں طلبا تعلیم حاصل کر رہے ہیں۔ یہاں ایرو اسپیس انجینئرنگ اور کمیونیکیشن سسٹم انجینئرنگ میں انڈرگریجویٹ ڈگری کو اس کے بنیادی شعبے کے طور پر پیش کیا جاتا ہے۔