پاکستان میں 60 کی دہائی کے آخر میں جب انڈسٹریل سیکٹر کو بڑھانے اور ملک میں نئی صنعتوں کے قیام کی ضرورت پیش آئی تو تربیت یافتہ افرادی قوت کے لیے پاک سوئس ٹریننگ سینٹر (پی ایس ٹی سی) کے قیام کا فیصلہ کیا گیا جبکہ اس پر عملدر آمد 1965 میں جا کر ہُوا اور اس اہم ادارے کا قیام عمل میں آیا۔ اس ادارے کے قیام میں پاکستان کو سوئٹزرلینڈ کا تعاون بھی حاصل تھا۔

مشینوں اور آلات کی درستی اور فعالیت کے شعبے میں خصوصی تکنیکی وسائل تیار کرنے کے لئے سوئٹزرلینڈ کے تعاون کا بے حد عمل دخل رہا ہے جبکہ اس کے تکنیکی تربیتی پروگرام میں سوئس تکنیکی تربیت کے طریقہ کار کی پیروی کی گئی ہے جو اس خصوصی ڈپلومہ کے ایوارڈ کے لیے عملی اور نظریاتی میٹنگ کی ضروریات کا منفرد امتزاج ہے۔

انڈسٹری میں اس کے تربیت یافتہ تکنیکی وسائل کی اعلیٰ مانگ کی وجہ سے یہ منصوبہ غیرمعمولی کامیابی کا حامل رہا ہے۔

مقامی انڈسٹری میں کام کرنے والے افراد کی صلاحیتوں کو بڑھانے اور انڈسٹری کی پوری طرح تربیت یافتہ، مستند افراد کی ضرورت کو پورا کرنے کے لیے اس ادارے نے بہت اہم کردار ادا کیا ہے اور تکنیکی تربیت کے حوالے سے پاکستانی انڈسٹری میں اعلیٰ معیارات قائم کیے ہیں۔ 

یہ وسائل آٹوموبائل کے شعبے کو فروغ دینے میں خاصے کارآمد رہے ہیں اور اس طرح ملک کی قومی مجموعی پیداوار (جی ڈی پی) میں اہم کردار ادا کیا ہے۔

انڈسٹری کی بڑھتی ہوئی ضروریات کو پورا کرنے کے لیے سوئس ٹیکنیکل ٹریننگ اسکیم کے تحت کراچی، کوئٹہ، پشاور ، گوادر اور لاہور میں بھی تربیتی مراکز قائم کئے ہیں جبکہ کراچی میں واقع سینٹر میں آئی پی سی کی ایک اور ٹیکنالوجی کا اضافہ کیا گیا ہے۔

اس اہم ادارے سے ہر سال 217 اسٹوڈنٹس ریگولر کورسز پاس کر کے انڈسٹری میں اپنی خدمات انجام دیتے ہیں جبکہ 250 اسٹوڈنٹس ہر سال یہاں سے شارٹ پروفیشنل کورسز کے ذریعے تربیت حاصل کرتے ہیں۔ 

پی ایس ٹی سی سے مختلف ٹیکنالوجیز میں تربیت حاصل کرنے والے 2300 سے زائد باصلاحیت ایسوسی ایٹ انجینئرز پاکستان اور پاکستان سے باہر اہم اداروں، صنعتوں اور تنظیموں کے لیے اپنی خدمات سر انجام دے رہے ہیں۔ 

یہاں سے تربیت حاصل کرنے والے بیشتر افراد اپنا کاروبار کررہے ہیں جس کے باعث پاکستان کی مقامی انڈسٹری میں ملازمتوں کے وسیع مواقع پیدا ہوئے ہیں۔